- Uchunguzi bado unaendelea, sampuli zimepelekwa kwa wataalam.
- Waziri ataka ushirikishwaji wa jamii katika utatuzi wa migogoro inayojitokeza.
- Serikali kuboresha mazingira na usalama wa watumishi wanaolinda rasilimali za taifa.
Huku uchunguzi ukiendelea kubaini ukweli kuhusu vifo vya wanyamapori vilivyotokea katika eneo la Hifadhi ya Ngorongoro, tarehe 18 Septemba 2026, Serikali imethibitisha kuongeza kwa idadi ya wanyama waliokufa, kutoka ni simba 10 hadi 11 pamoja na fisi wawili. Kadhalika uchunguzi zaidi umebaini kuwa baadhi ya mizoga ilikuwa na majeraha.
Awali, taarifa kwa umma kutoka Mamlaka ya Uhifadhi ya Ngorongoro (NCAA), ambayo ilitolewa tarehe 19 Septemba 2026 na Hamis Dambaya ambaye ni Kaimu Meneja wa Kitengo cha Uhusiano kwa Umma, ilitaja idadi ya simba waliokufa kuwa kumi.
Dambaya alisema kuwa uchunguzi wa awali ulionyesha kuwa wanyama hao huenda waliuawa kwa kulishwa sumu, na kuwa mamlaka ilikuwa imeanzisha uchunguzi wa kina na wa kitaalam kubaini chanzo na kwamba taarifa zaidi ingetolewa mara baada ya uchunguzi kukamilika.
Akiongea na Mongabay kwa njia ya simu jana, Dambaya alisema mizoga ya wanyama hao ilikutwa katika eneo lilelile la Endulen, kata ya Ndutu iliyoko mkoani Arusha, eneo ambalo ilikutwa mizoga ya simba 10 walioripotiwa awali.
“Bado uchunguzi unaendelea na sampuli zimepelekwa kwa wataalam. Huenda wale fisi walikula mizoga yenye sumu kabla ya kuharibiwa,” alisema Dambaya.
Taarifa ya Waziri
Waziri wa Maliasili na Utalii, Dk. Ashatu Kijaji, akitoa taarifa ya serikali kwa waandishi wa habari kuhusu vifo hivyo, alitilia mkazo mawasiliano mazuri, ushirikishwaji wa jamii na utatuzi wa changamoto na migogoro inayojitokeza kwa njia za amani, na kwa mujibu wa sheria.
“Serikali itaendelea kuchukua hatua zinazohitajika kuboresha mazingira ya utendaji kazi na usalama wa watumishi wanaotekeleza majukumu ya ulinzi wa rasilimali za taifa”, alisema.
Licha ya vifo vya wanyamapori, Waziri alizungumzia pia mauaji ya watu sita wakiwemo watumishi wa uhifadhi, katika tukio lililotokea Septemba 18, 2026 katika eneo la Hifadhi ya Wanyamapori Ipole, mkoani Tabora. Watumishi hao waliuawa wakati walipokuwa katika utekelezaji wa majukumu yao ya ulinzi. Licha ya vifo, kulikuwa na majaruhi watano.
Kwa mujibu wa Kamanda wa Polisi wa mkoa wa Tabora, Kamishna Msaidizi wa Polisi (ACP) Twaha Juma Lulengelule, waliouawa ni askari wa wanyamapori wa vijiji (VGS) na askari wa Mamlaka ya Usimamizi wa Wanyamapori Tanzania (TAWA). Walitajwa kuwa ni VGS Daniel Mshama, mkazi wa Itimile; VGS Robert Charles Msabaha (36), mkazi wa Ipole; Gift Eliyaika (24), mkazi wa Inyonga; Ofisa wa Wanyamapori aitwaye Praygod Lyalo (38), mkazi wa Majengo; James Maganga (35), mkazi wa Ipole; na dereva Mathew Damas (35), mkazi wa Ipole.
Waliojeruhiwa ni VGS Andrew Charles (35), mkazi wa Ipole; VGS Edison Kafupa (33), mkazi wa Ipole; VGS Victor Mengo (26), mkazi wa Ipole; na askari wa TAWA Joseph Mwaipola (43), mkazi wa Inyonga.
Kwa mujibu wa maelezo ya awali, tukio hilo lilitokea wakati askari wa TAWA na walinzi wa Jumuiya ya Hifadhi ya Wanyamapori Ipole (JUHIWAI) wakiendesha operesheni ya kukamata na kuweka kwenye uzio mifugo iliyodaiwa kuingizwa hifadhini.
Inadaiwa kuwa kundi la wafugaji lilifika kambini usiku wa manane likitaka kuchukua mifugo iliyokamatwa, kabla ya kuzuka kwa mashambulizi yaliyotumia silaha za jadi.
Katika tukio hilo, silaha moja aina ya AK-47 na gari aina ya Toyota Land Cruiser, lenye namba za usajili T 623 EAV, vilichomwa.
Picha ya bango: Jamii zinazoishi karibu na maeneo ya wanyamapori zina nafasi muhimu katika kulinda na kuhifadhi rasilimali hizi. Kuzisikiliza, kuzishirikisha katika maamuzi na kuhakikisha zinanufaika na uhifadhi kunaweza kuimarisha ulinzi wa wanyamapori na kupunguza migogoro kati ya binadamu na wanyamapori. Picha kwa hisani ya Mamlaka ya Hifadhi ya Ngorongoro, (NCAA).
Kutambua ushiriki
