- Ni katika shauri la kukutwa na meno ya tembo, mifupa ya simba.
- Upande wa Jamhuri wadai unapambana kutafsiri nyaraka zilizotolewa Msumbiji.
- Mahakama yapanga tarehe nyingine ya kesi kutajwa.
- Shauri hilo lilifikishwa kortini kwa mara ya kwanza, mwaka 2023.
DAR-ES-SALAAM, Tanzania – Upelelezi wa shauri la Uhujumu Uchumi linalomkabili Abdul Hamad na wenzake wanaoshtakiwa kwa kuongoza genge la uhalifu, kukutwa na meno ya tembo, kucha na mifupa ya simba bila kibali haujakamilika kutokana na Jamhuri kuendelea kutafsiri nyaraka zilizoandikwa kwa lugha ya Kireno kutoka Msumbiji.
Hatua ya kutafsiri nyaraka
Akiiwakilisha Jamhuri, Wakili wa Serikali, Pankasia Protas, alidai katika Mahakama ya Hakimu Mkazi Kisutu, Dar es Salaam mbele mbele ya Hakimu Mkazi Mkuu Gwantwa Mwankuga, kuwa upelelezi wa shauri hilo haujakamilika kwa sababu Jamhuri imefikia hatua ya kutafsiri nyaraka kutoka nchini Msumbiji zilizoandikwa kwa lugha ya Kireno.
“Tunapambana kutafsiri nyaraka zilizotolewa Msumbiji, ziko kwenye lugha ya Kireno. Tunaomba mahakama ipange tarehe nyingine ya kesi kutajwa ,” alisema Wakili Protas, ombi ambalo mahakama ililikubali na kuahirisha shauri hilo hadi Oktoba 6, 2026, litakapoletwa kwa ajili ya kutajwa tena.
Shauri hilo lilifikishwa mahakamani kwa mara ya kwanza, mwaka 2023, likiwa na washitakiwa; Abdul Hamad, Kampuni ya AB Marine Products Ltd iliyopo Ubungo Maziwa, Roseline Wandera, Kennedy Mwambeta na Noel Kasaro. Wengine ni Tito Mwabe na Erasto Makinda, Theresia Lukanga, Abubakari Pazi, Haipeng Guo, Yassir Husein, Peter Kikweka.
Hati ya mashitaka
Washitakiwa katika shauri hilo wanadaiwa kuwa kati ya Januari Mosi, mwaka 2019 na Mei 27 mwaka 2023, katika uwanja wa ndege wa Pemba na Cabo Delgado Province, nchini Msumbiji, waliongoza genge la uhalifu kwa kupokea, kuuza na kusafirisha vipande 166 vya meno ya tembo, mali ya Serikali ya Jamhuri ya Muungano wa Tanzania na Msumbiji, bila kuwa na kibali kutoka kwa Wakurugenzi wa Wanyamapori.
Mashitaka mengine ni kupatikana na meno 20 ya tembo, kucha 65 za simba na vipande 1107 vya mifupa ya simba bila kuwa na kibali, vyote vikiwa na thamani ya TSh3,346,909,639.2, ($1.263 milioni).
Mashitaka ya kugushi
Pia washitakiwa hao wanadaiwa kuwa Mei 27 mwaka 2023, katika eneo lisilojulikana nchini Msumbiji, kwa nia ovu, walighushi nyaraka ya ubebaji mizigo na cheti cha afya, wakionyesha kuwa nyaraka hizo ni halali na zimetolewa na Mamlaka ya Wanyamapori ya Msumbuji, jambo ambalo walijua kuwa sio kweli.
Pia wanadaiwa kughushi nyaraka ikionyesha kuwa Mamlaka ya Wanyamapori ya Msumbiji imeruhusu kusafirisha samaki aina ya kaa wakiwa hai kutoka nchini humo kwenda Kuala Lumpur Malaysia, kupitia uwanja wa Ndege wa Kimataifa wa Mwalimu Julius Nyerere (JNIA), uliopo jijini Dar es Salaam.
Katika mashitaka ya kutakatisha fedha, ilidaiwa kuwa, mshitakiwa Hamad na Kampuni ya AB Marine Products Ltd, kati ya Machi 28 mwaka 2021 na Machi 27 mwaka 2023, katika eneo la Mabibo, walijipatia nyumba moja wakati wakijua kuwa fedha za ununuzi wa nyumba hiyo zinatokana na zao la kosa tangulizi la kughushi nyaraka na kupatikana na nyara za Serikali.
Pia mshitakiwa Mwambeta alidaiwa kujipatia gari aina ya Toyota Prado kupitia mapato yaliyotokana na makosa ya kughushi na kumiliki nyara za Serikali kinyume cha Sheria.
Mshitakiwa huyo alidaiwa kati ya Oktoba 11, 2021 na Mei 27, 2023, maeneo ya Kunduchi Mtongani Manispaa ya Kinondoni, alijipatia gari aina ya Toyota Land Rover kupitia mapato yalitokana na makosa ya kughushi, kumiliki na kuuza nyara za Serikali kinyume cha Sheria.
Picha ya bango: Kukutwa na kucha na mifupa ya simba bila kibali ni miongoni mwa makosa ambayo washitakiwa katika shauri hili, wanadaiwa kutenda. Picha kwa hisani ya blogu ya Utalii Tanzania.
Raia wa Korea Kaskazini anayedaiwa kukutwa na meno ya tembo, aachiwa huru
Kutambua ushiriki
