- Moshi wa bidhaa zilizoungua unaweza kuwa chanzo cha uchafuzi wa hewa.
- Mabaki ya moto yanaweza pia kusababisha uchafuzi wa maji.
- Ikolojia ya Ziwa Tanganyika inaweza kuathiriwa kutokana na mifereji ya maji Bujumbura.
Moto mkubwa umezuka katika majengo ya maduka ya ETS Ndayizamba na Le Parisien, yaliyoko katikati ya mji wa kiuchumi, Bujumbura, Burundi. Kwa wafanyabiashara, moto huo umesababisha hasara kubwa kiuchumi lakini kwa wana mazingira, moto huo unaweza kuwa chanzo kikubwa cha uchafuzi wa hewa.
Hilaire Habarugira, mtaalamu wa mazingira nchini Burundi aliiambia Mongabay kuwa moshi wa bidhaa zilizoharibiwa na moto vikiwemo vifaa vya plastiki, nguo, viatu, vifaa vya kufungashia, betri, mafuta, kemikali pamoja na vifaa vya kielektroniki, unaweza kuwa chanzo kikubwa cha uchafuzi wa hewa.
“Mabaki ya moto yanaweza kuendelea kuchafua mazingira hata baada ya moto kuzimwa,” alisema Habarugira.
Pierre Nduwayo ambaye ni mwanaharakati wa masuala ya mazingira, aliiambia Mongabay kuwa mabaki ya moto huo pia yanaweza kusababisha uchafuzi wa maji.
“Wakati wa mvua, majivu na kemikali zenye sumu vinaweza kusombwa na maji kuingia kwenye mifereji, mito na maziwa, na hivyo kuchafua vyanzo vya maji,” alisema.
Kwa kuwa baadhi ya mifereji ya maji ya Bujumbura humwaga maji yake katika Ziwa Tanganyika, mfumo wa ikolojia wa ziwa hilo unaweza kuwa hatarini iwapo hatua madhubuti hazitachukuliwa.
Moto huo ambao chanzo chake hakijafahamika ulianza majira ya saa kumi na mbili asubuhi katika mojawapo ya ghorofa za majengo hayo.
Walinzi wa majengo hayo walidai kuwa licha huduma za zimamoto Licha ya idara ya Zimamoto kufika haraka eneo la tukio ili kujaribu kuudhibiti, moto uliendelea kuteketeza maduka hayo kwa saa kadhaa, na kuharibu kabisa maduka yote mawili.
Makamu wa Rais wa Jamhuri, Prosper Bazombanza, akiwa pamoja na Gavana wa Mkoa wa Bujumbura, walitembelea eneo la tukio.
Akizungumza na waandishi wa habari, Makamu wa Rais alisema kuwa chanzo halisi cha moto huo bado hakijajulikana.
“Itakuwa vigumu katika hatua hii kuhusisha moto huo na vitendo vya uhalifu, hasa kwa kuwa iliripotiwa kuwa ulianza mapema sana asubuhi, kabla ya mtu yeyote kuingia katika maeneo hayo,’’ alisema.
Mbali na kuchunguza chanzo cha moto huo, Makamu wa Rais aliwahimiza wafanyabiashara na wamiliki wa majengo ya biashara kukata bima ili kujilinda vyema zaidi dhidi ya athari za kifedha zinazotokana na matukio ya aina hiyo.
“Ajali ya namna hii inapotokea, nchi hupata hasara, lakini wale waliokatia bima mali zao wanaweza kufidiwa,” alieleza mbele ya waandishi wa habari.
Picha ya Bango: Majengo ya maduka ya ETS Ndayizamba na Le Parisien yaliyoko katikati ya mji wa kiuchumi, Bujumbura, Burundi yajiungua kwa moto. Picha na Thérence Hategekimana.
Kutambua ushiriki
